মনিপুর ইক্সত্রাওদিনরি গেজেট নম্বর ৪০৮ দেটেদ ০৯/১২/২০১৬ অমসুং সেক্রেটরিয়েট, রেভেনিউ দিপার্টমেন্ট ওদর নম্বর ১৬/১২/২০১৬-আর দেটেদ দিসেম্বর ৮, ২০১৬গী মতুং ইন্না, মনিপুর গোভর্ন্মেন্টনা অনৌবা জিলা তরেৎ শেম্বদা “ককচিং জিলা” শোক ২০১৬গী ডিসেম্বর তাং ৮দগী লৈবা হৌখি । জিলা অসি মনিপুরগী মখা থংবা শরুক্তা লৈ । জিলা অসিগী অৱাংদা থৌবাল জিলা অমসুং ইম্ফাল নোংচুপ জিলা, নোংপোক্তা তেংনৌপল জিলা অমসুং চান্দেল জিলা, নোংচুপ্তা বিষ্ণুপুর জিলা, মখাদা চান্দেল জিলা লৈ । মনিপুরগী তম্পাক্কী লৈমায় অসি সমুদ্রগী ইমায়গী মথক মিতর ৭৯০দা লৈ । ককচিং জিলাগী লৈমায়সু মসিগা খেন্নদে । জিলা অসি তমপাক্কী লম ওইরবসু, জিলাসিগী লম পুম্নমক লৈতেম মান্নবা ওইদে । মরমদি মসিদা তুরেল কয়া চেল্লি, পাৎ ময়াম অমসু মরক্তা লৈ । পাৎশিং অসিগী খরদি ৱারী শিংবুনদা লীনরি ।
বিধান সভাগী কেন্দ্রা মরি – হিয়াংলম কেন্দ্রা, ৱাবগাই কেন্দ্র, সুগুনু কেন্দ্র অমসুং ককচিং কেন্দ্রগী শরুক য়ামদ্রবদা খর খরদি ককচিং জিলাগী মনুংদা লৈ। জিলা অসিদা সব-দিবিজন অনি – ককচিং সব–দিবিজন অমসুং ৱাইখোং সব-দিবিজন, ম্যুনিসিপাল কাউন্সিল অহুম – ককচিং ম্যুনিসিপাল কাউন্সিল, ককচিং খুনৌ ম্যুনিসিপাল কাউন্সিল অমসুং সুগুনু ম্যুনিসিপাল কাউন্সিল লৈ । কম্যুনিটি দিভল্পমেন্ট ব্লোক অনিসু লৈ, অমনা ককচিংদা অদুগা অমনা ৱাইখোং সব-দিরিজনদা ।
লৈফম
মনিপুরগী খাথংবা তম্পাক্কী শরক অয়াম্বা ককচিং জিলানা কনশিল্লি । জিলা অসি ২৪.৬৪ এনঃ অমসুং ২৪.২৩ এনঃ লেটিট্যুদ অমসুং ৯৪.০৭ ই অমসুং ৯৩.৪২ ই লোঙ্গীট্যুদতা লৈ ।
হৱা-নুংশিৎ
ককচিং জিলা হৱা-নুংশিৎ – অইং-অশাগী চাং থোইনা কায়দে ফৈ । জিলাসিগী মফম খুদিং নোং ফজনা চুই । মোইরাংলাইজিরোমদগী হৌরকপা নোংনা জুনদগী সেপতেম্বর ফাওবা তাই । মোনসুন হনখিবগা লোয়নবা নোংনা মরক মরক্তা লিফেৎ লিফেৎ তাই । ডিসেম্বরদগী ফেব্রুৱারী ফাওবা নিংথমথা ওই । নিংথম থাদসু অৱাংগী নোংহৌনা করিগুম্বদা নোং তাই। মার্চ অমসুং ওক্তোবর (মেরা অমসুং ফাইরেল-লমতা) অসি চহি অমগী মনুংদা খ্বাইদগী নুংঙাইবা মতমনি। অদুবু ইকুই কুইদনা অইং-অশাগী চাং অহোংবা লাকলে; মসি মরু ওইনা উমং কোকথোকপদগীনি। অদুনা মফম মতম চাবদা উ থাবগী থবক তৌদবা য়াদবনি ।
কালেন্দা জিলা অসি ৩২º সিঃ দগী ৩৫º সিঃদা লৈ; য়াম্না শাবা ওইদে। এপ্রিলদগী জুন ফাওবদা ৩৭º সিঃ দগী হেন্না শাদে। ডিসেম্বরদগী ফেব্রুৱারী ফাওবা নিংথমথা ওইদুনা অইং-অশাগী চাং ৬º সিঃ দগী ৪º সিঃদা লৈ।
লম্বী-থোং
য়াম্না মরু ওইবা অচৌবা সোরোক নম্বর ৩৯ অসি জিলা অসি ফাওদুনা চৎলি। মসিনা মোরে অমসুং তমু ফাওদুনা বর্মা য়ৌখি। ভারতনা নিংতম্বা ফংদ্রিঙৈদা লম্বী অসি ইতিহাসিক ওইনা মনিপুরগী অমসুং বর্মাগী লান্মীশিংনা লাল তাথোক-তাশিন তৌবদা শীজিন্নরম্মী। অদুগা মতমদুদা লম্বীসি য়াম্না খুবা খোঙ লম্বী ওইনা লৈরম্মী। হৌজিক্না লম্বীসি চাকহোন লম্বীনি।
তুরেলশিং
ককচিং জিলাগী মনুংদা চেল্লিবা মরু ওইবা তুরেলদি ইম্ফাল তুরেল অমসুং থৌবাল তুরেলনি। তুরেলশিং অসিনা অৱাং অমসুং নোংচুপলোমদা থৌবাল জিলাগী লমখৈ খায়বদা মরু ওই। মতম অমদা তুরেলশিং অসি পোৎ পুথোক পুশিন অমসুং লল্লোন-ইতিক্তা য়াম্না কান্নরম্মী। জিলা অসিগী অতোপ্পা তুরেলশিংদি ৱাংজিং, অরোং অমদি সেকমাই তুরেলশিংনি। অদুবু হৌজিক্কী মতমগী লায়না অমসুং থুনা শীজিন্নবা য়াবা লম্বী কয়া থোকলকপা মরম্না হায়রিবা তুরেলশিং অসি হান্নগুম লল্লোন-ইতিক্তা পোৎ পুথোক পুশিনদা থোইদোক্না কান্নবা ওইদ্রে। তুরেলশিং অসিদগী লৈঙোই, নুংজেং, নুংনচিংবা লৌদুনা য়ুম-কৈ শাবদা শীজিন্নৈ। চান-থক্নবা ফিশু-ফিজাম ইরুজবনচিংবগী হিরম কয়াদা তুরেলশিং অসি কান্নরি।
ককচিং জিলাগী মখা থংবা শরুক খরদি অনেম্বা লৈমায়নি – লোক্তাক পাৎকী লমনি। নোংগী ঈশিং লৈবা অথেন্বা পাৎ মচা খরা লৈ; মথোয় অদুদি খরুং পাৎ, ইকোপ পাৎ, পুম্লেন পাৎ, লৌশি পাৎ, অমসুং ঙাঙৌ পাৎনি ।